Útskrifaður eftir rannsókn

Ökumaður malarflutningabílsins sem ók út af brúnni yfir Laxá í Laxárdal í gær var útskrifaður af slysadeild eftir rannsókn. Bíllinn hafnaði á hvolfi í grýttum árfarveginum, meira en tíu metrum neðar, en áður hafði bíllinn sópað sterku vegriði á brúnni niður á löngum kafla. Ökumaðurinn var fluttur í sjúkrabíl á slysadeild Landspítalans í Reykjavík og kom þá í ljós að hann hafði ekki einu sinni beinbrotnað. Tildrög voru þau að vörubílnum og jeppa, með fjórum manneskjum í, var ekið samtímis inn á einbreiða brúnna. Svo virðist sem ökumaður vörubílsins hafi gripið til þess ráðs, fremur en að lenda beint framan á jeppanum þar sem hjón voru á ferð með tvö börn sín, að sveigja út af brúnni. Rakst vörubíllinn aðeins lítillega utan í jeppann í leiðinni og slasaðist enginn í honum. Lögregluþjónn úr Búðardal sem var á vettvangi líkti þessu við hreint kraftaverk. Malarflutningabíllinn er gjörónýtur.