Aukið álag á vegina

Aukin umferð vöruflutningabifreiða um þjóðvegi hefur í för með sér aukið slit á vegum og sumstaðar aukna slysahættu. Auknar líkur á banaslysi þegar þyngdarmunur bifreiða í árekstri er mjög mikill, segir formaður Rannsóknarnefndar umferðarslysa. Strandsiglingar Eimskips fluttu á síðasta ári 140.000 tonn milli staða hér á landi. Eimskipafélagið tók í síðustu viku ákvörðun um að hætta siglingunum og nota frekar landflutninganet félagsins til að flytja vörur á milli staða. "Þetta veldur fyrst og fremst meira álagi á vegakerfið," segir Sigurður Helgason, umferðaröryggissviði Umferðarstofu. "Bílstjórar vöruflutningabifreiða kunna oftast vel sitt fag og hafa sýnt það og sannað gegnum tíðina." Sigurður segir slys vöruflutningabifreiða ekki tíðari en gengur og gerist. "Þegar slysin hins vegar verða geta þau orðið dýrkeypt því oft er dýr farmur um borð í bílunum sem getur skemmst," segir Sigurður og bætir við að árekstrar flutningabíla við aðra bíla séu ekki mjög algengir. "Það er frekar að vöruflutningabílarnir velti út af vegunum en þá hafa bílstjórarnir sem betur fer yfirleitt sloppið vel." Sigurður telur þessa þróun þó ekki æskilega. "Það ætti að vera hægt að finna einhverja málamiðlun þannig að þær vörur sem ekki bráðliggur á séu fluttar með skipum." "Niðurbrot veganna eykst hratt með þungaumferð," segir Rögnvaldur Gunnarsson, forstöðumaður framkvæmdadeildar Vegagerðarinnar og bætir við að vegirnir endist því skemur. Rögnvaldur segir að á vorin sjáist oft merki þess að slitlagið skemmist meira með aukinni þungaumferð. "Þetta sést að sjálfsögðu ekkert dag frá degi en til lengri tíma litið eykst niðurbrot veganna við aukinn þunga árið um kring. Vegirnir eru misvel undirbúnir undir slíkt, til dæmis þegar frost er að fara úr jörðu." "Þegar þyngdarmunur ökutækja sem lenda í árekstri er mikill aukast líkurnar á banaslysi," segir Ágúst Mogensen, framkvæmdastjóri Rannsóknarnefndar umferðarslysa. "Það er þessi eðlisfræði í árekstrunum sem við höfum áhyggjur af." Ágúst bendir einnig á að vegir á Íslandi séu ekki sérstaklega breiðir. "Þannig má segja að með meiri umferð stærri bíla gætum við verið að horfa í ákveðna aukna slysahættu." Ágúst bendir þó á að þar með sé ekki sagt að ökumenn stærri bíla geri fleiri mistök en aðrir ökumenn.