Fischer kom Íslandi á kortið

Skáksamband Íslands afhendir í dag fulltrúa sendiherra Bandaríkjanna áskorun um að Bandaríkjaforseti náði Bobby Fischer, fyrrverandi heimsmeistara í skák. Þótt hann sé ekki íslenskur ríkisborgari kemur málið okkur við, segja skákáhugamenn. Skáksambandið segir Fischer hafa verið útlægan frá Bandaríkjunum í tólf ár eftir að yfirvöld ákærðu hann fyrir að brjóta viðskiptabann við Júgóslavíu með því að tefla þar 1992. Fischer hefur verið í fangelsi í vikutíma eftir að hann var handtekinn í Japan á leið til Filippseyja með falsað vegabréf. Yfirvöld í Japan segjast þurfa meiri tíma áður en ákvörðun verði tekin um það hvort hann verði framseldur til Bandaríkjanna. Formleg beiðni hefur borist utanríkisráðuneytinu um aðkomu að málinu. Bæði Björn Ingi Hrafnsson, aðstoðarmaður utanríkisráðherra, og Benedikt Höskuldsson, sendifulltrúi í íslenska sendiráðinu í Japan, segja í Morgunblaðinu í dag að málið komi í raun ekki íslenska stjórnkerfinu við þar sem Fischer sé ekki íslenskur ríkisborgari. Björn Ingi segir þó málið til skoðunar í utanríkisráðuneytinu. Hrafn Jökulsson, skákáhugamaður og formaður Hróksins, segir að Fischer hafi gert fleira fyrir Ísland en margir íslenskir ríkisborgarar með því að koma landinu á heimskortið þegar hann sigraði í heimsmeistaraeinvígi við Boris Spasský hér á landi 1972. Fyrir það, og skáksnilld hans, vilji Skáksambandið verðlauna Fischer með því að hvetja til þess að ákærur verði felldar niður gegn honum. Áskorun Skáksambandsins til Bandaríkjaforseta verður afhent fulltrúa sendiherra landsins í bandaríska sendiráðinu klukkan 14 í dag.