Bók Ómars uppseld

Bók Ómars Ragnarssonar, Kárahnjúkar - með og á móti, rýkur út og er nánast alltaf biðröð út á götu þegar Ómar áritar bókina að því er segir á heimasíðu JPV-útgáfu sem gefur bókina út. Bókin kom út á miðvikudag og seldist hún upp á svipstundu. Hún er væntanleg aftur í búðir síðar í þessari viku. Ómar mun á næstunni verða á flugvél sinni, Frúnni, við þjóðveginn og árita bókina fyrir vegfarendur. Hann mun lenda vélinni á túni hjá velviljuðum bændum sem land eiga að þjóðvegi eitt. Myndin var tekin þegar Ómar áritaði bókina í Bókabúð Máls og menningar á Laugaveginum sl. laugardag.