Frelsum Bobby

Frelsum Bobby samtökin verða stofnuð hér á landi til að freista þess að frelsa Bobby Fischer úr varðhaldi í Japan og búa honum áhyggjulaust ævikvöld á Íslandi. Á morgun verður sett upp vefsíða undir nafninu „Free Bobby“ og er markmiðið að ná þannig til heimsbyggðarinnar allrar. Bobby Fischer, sem talinn er einn mesti skáksnillingur sögunnar, hefur verið í varðhaldi í Japan að undanförnu. Bandarísk stjórnvöld hafa krafist framsals hans og á hann yfir höfði sér allt að tíu ára fangelsi fyrir að brjóta viðskiptabann við Júgóslavíu með því að tefla þar við Boris Spasskí í tilefni af 20 ára afmæli einvígis aldarinnar árið 1992. Skákáhugamenn hér á landi eru slegnir yfir þessum fréttum og vilja að Íslendingar rétti Fischer hjálparhönd þar sem hann hafi unnið ómetanlegt verk fyrir Ísland og skáklistina. Þá verði ekki hjá því litið að ranglæti felist í því að hneppa mann í tíu ára fangelsi fyrir að hafa teflt skák í landi sem er ekki lengur til.  Hrafn Jökulsson, formaður Hróksins, segir að í fyrsta umgangi verði reynt að vekja sem mesta athygli á högum snillingsins. Í þeim efnum sé verið að opna vefsíðu þar sem herferðin „Free Bobby“ verður rekin. Hrafn segir að á sömu forsendum og Bandaríkjamenn ráku baráttu fyrir því að frelsa hinn aldurhnigna, íslenska háhyrning, þ.e. Keikó, hér um árið, þá verði barist fyrir því að frelsa hinn roskna, bandaríska skákmeistara. Þetta verður kynnt í hinum alþjóðlega skákheimi og undirskriftum verður safnað á vefsíðunni.   Það eru Skákfélagið Hrókurinn og Birtingarholt sem standa fyrir vefsíðunni og verður hún opnuð formlega á morgun. Markmiðið er að Bobby Fischer fái hæli hér á Íslandi. Hrafn segir menn auðvitað vera slegna þegar þeir velti fyrir sér þessum óþarfa harmleik sem nú eigi sér stað.