Sri ófundin - maðurinn þegir enn

Leit lögreglunnar að Sri Rhamawati hefur engum árangri skilað, né heldur yfirheyrslur yfir manninum sem grunaður er um að vera valdur að hvarfi hennar. Lögregla segir yfirheyrslur fara fram þegar aðstæður gefi tilefni til. Maðurinn, sem setið hefur í gæsluvarðhaldsvist á Litla Hrauni frá 6. júlí, var síðast yfirheyrður á laugardag. Eins og fram hefur komið hefur hann ekkert viljað tjá sig við lögreglu um atburði aðfararnætur 4. júlí þegar grunur leikur á að hann hafi orðið Sri Rhamawati að bana. Engin breyting hefur orðið þar á. Allri vitneskju eða þeim upplýsingum sem hann kann að búa yfir í tengslum við hvarf fyrrum sambýliskonu sinnar og barnsmóður heldur hann fyrir sig. Ekki fékkst uppgefið hjá lögreglu hvort hann er samvinnuþýðari við geðrannsókn, sem nú er hafin. Lögregla hefur leitað að Sri á þeim stöðum þar sem þeir telja hugsanlega að henni hafi verið komið fyrir, en án árangurs hingað til. Leit á höfuðborgarsvæðinu og í grennd við það hélt áfram í dag þar sem lögregla naut liðsinnis Slysavarnarfélagsins Landsbjargar. Ekki fæst uppgefið hvar leitin fer nú fram, einungis að ákveðin svæði séu tekin skipulega fyrir. Að sögn lögreglu eru menn bjartsýnir á að það takist að ráða fram úr málinu, þrátt fyrir að Sri Rhamawati sé ófundin og maðurinn sem talið er að viti um afdrif hennar láti ekkert uppi.