Samtök um frelsun Fischers stofnuð

Íslendingar vinna að stofnun alþjóðlegrar hreyfingar um frelsun Bobbys Fischers. Hrafn Jökulsson, einn forsvarsmannanna, segir að fyrst hægt hafi verið að stofna hreyfingu um frelsun roskins háhyrnings, þá hljóti það sama að vera hægt um roskinn skáksnilling.  Bandaríkjamaðurinn Bobby Fischer, sem talinn er mesti skáksnillingur sögunnar, hefur verið í varðhaldi í Japan að undanförnu. Bandarísk stjórnvöld hafa krafist framsals hans og á hann yfir höfði sér allt að tíu ára fangelsi fyrir að brjóta viðskiptabann við Júgóslavíu með því að tefla þar árið 1992. Hann hefur því ekki getað komið til heimalands síns í tólf ár. Skáksamband Íslands sendi frá sér ályktun í síðustu viku og skoraði á forseta Bandaríkjanna að fella niður sakir gegn Fischer. Hrafn Jökulsson, sem situr í stjórn sambandsins, segir málið þegar hafa vakið mikla athygli erlendra fjölmiðla. Hann segir Bobby Fischer njóta mikillar hylli á Íslandi og eiga hér marga vini, enda sé það ógleymanlegt þegar hann tryggði sér heimsmeistaratitilinn í skák í Reykjavík árið 1972. Hrafn segir marga hér á landi reiðubúna til að rétta Fischer hjálparhönd. Hann segir þá vilja stuðla að því að Bandaríkjamenn hætti að ofsækja eina helstu hetju bandarískrar afrekssögu. Aðspurður hvort samtökin verði eitthvað í líkingu við samtökin Frelsun Keikós segir Hrafn að fyrst Bandaríkjamenn hafi getað stofnað samtök til þess að hneppa úr prísund roskinn, íslenskan háhyrning, þá hljóti Íslendingar að geta stofnað samtök til að leysa úr fangelsi roskinn, bandarískan skáksnilling. Hægt er að hlusta á viðtal við Hrafn Jökulsson úr hádegisfréttum Bylgjunnar með því að smella á hlekkinn hér að neðan.