Selja fyrir 1.200 milljónir

Bæjarstjórn Vestmannaeyjabæjar hyggst selja eignir bæjarins til hlutafélagsins Fasteignar fyrir allt að 1.200 milljónir króna. Horft er til Félagsheimilisins Þórs- og Týsheimilanna, Safnahússins og Listaskólans. Bærinn fær eignarhlut í félaginu og gerir leigusamning um húseignirnar til þrjátíu ára. Leiguverð fasteignanna gæti numið í kringum 107 milljónir króna á ári. Viktor Stefán Pálsson, framkvæmdastjóri stjórnsýslu og fjármálasviðs Vestmannaeyjabæjar, segir kosti sölunnar marga. "Þetta á að þýða minni rekstrarumsvif hjá bænum og töluvert gegnsæi í útgjöldum." Viktor segir að verið sé að losa um fjármagn til að greiða niður óhagstæð lán. "Þannig erum við að ná niður fjármagnskostnaðinum hjá bænum. Við teljum að þetta sé ódýrara fjármagn en nú þegar hvíla á rekstri bæjarins. Síðan er ótalinn sá kostur sem fellst í því að koma eignunum í gott horf." Viktor nefnir einnig ávöxtun á eignarhlut bæjarins í félaginu sem kost. Guðjón Hjörleifsson, oddviti sjálfstæðismanna í minnihluta bæjarstjórnar, segir að meiri tíma hefði þurft til að fara yfir alla þætti samningsins. "Miðað við fyrstu skoðun okkar á þessu máli þá teljum við að menn séu að eyða miklu meiri peningum heldur en ef menn væru með venjuleg lán og borguðu þau upp á sama tíma." Guðjón bendir á að ef 1.200 milljónir séu teknar að láni til 30 ára sé greiðslubyrðin á ári 78,062 milljónir sé miðað við 5% vexti. Það sé 840 milljónum lægra en leigugreiðslur á 30 árum. "Jafnframt ef við ætlum að kaupa eignirnar eftir 30 ár eins og samningurinn gerir ráð fyrir kostar það okkur rúmar 500 milljónir. Þarna erum við með rúmlega 1.400 milljónir sem er hærri tala en kaupverðið í dag. " Guðjón vill fá álit fagmanna á kaupunum. Viktor segir málið hafa verið í vinnslu hjá Vestmannaeyjabæ frá síðasta hausti. "Nú á eftir að ganga frá endanlegum samningi; hvaða eignir nákvæmlega fara þarna inn og hversu stór hluti af þessum 1.200 milljónum verði settir í félagið.