3 ár fyrir kynferðisbrot

Karlmaður hefur verið dæmdur í þriggja ára fangelsi í Héraðsdómi Suðurlands fyrir kynferðisbrot gegn tveimur dætrum sínum og vinkonu þeirra. Stúlkurnar voru 11 og 12 ára þegar brotin voru framin en þau áttu sér stað á árunum 1996 til 2003, bæði á heimili ákærða og í sumarhúsi móður hans. Dætur mannsins eru fæddar árið 1984 og 1988 og þriðja stúlkan, sem er vinkona dætranna, er fædd árið 1989. Maðurinn var m.a. sakaður um að hafa káfað á kynfærum stúlknanna og reynt að hafa við þær samræði. Brotin töldust varða við almenn hegningarlög og var þess krafist að maðurinn yrði dæmdur til refsingar og til greiðslu á fjórðu milljón króna í miskabætur. Maðurinn krafðist sýknu af öllum kröfum. Í niðurstöðu Héraðsdóms Suðurlands segir að framburður stúlknanna í Barnahúsi hafi þótt trúverðugur. Brotin sem maðurinn er sakfelldur fyrir séu alvarleg en önnur dætra hans var einungis 11 ára gömul þegar hann braut fyrst gegn henni. Dómurinn telur að með háttsemi sinni hafi maðurinn brotið alvarlega og gróflega gegn skyldum sínum sem foreldri og uppalandi. Þriðja stúlkan var 13 ára þegar hann braut gegn henni en hún var í heimsókn hjá honum og fjölskyldu hans úti á landi og hafði ákærða þannig verið treyst fyrir henni. Í dómnum segir að ljóst sé að brotin munu hafa alvarleg áhrif á andlega og líkamlega heilsu stúlknanna í framtíðinni en fyrir dóminn voru lögð gögn sem sýndu fram á að brotin hefðu valdið stúlkunum margvíslegum sálrænum erfiðleikum. Héraðsdómi þótti hæfileg refsing þriggja ára fangelsi og voru stúlkurnar taldar eiga ótvíræðan rétt til miskabóta, samtals 1,2 milljónir króna. Var maðurinn dæmdur til að greiða einni stúlknanna 700 þúsund krónur í miskabætur, annarri 400 þúsund og þeirri þriðju 100 þúsund krónur. Hann skal að auki greiða allan sakarkostnað og málsvarnarlaun, samtals 900 þúsund krónur.