Skífuskank og taktkjaftur

Á morgun klukkan 20 lýkur Unglist með stórviðburði í Tjarnarbíó. Þá mæta hörðustu hip hop-hausar landsins á svæðið og spreyta sig í hinum fræknu greinum skífuskanki og taktkjafti. Skipuleggjandi keppninnar er Ómar Ómar en hann er einn af forsprökkum samtakanna TFA (tími fyrir aðgerðir). "Við höldum upp á afmæli hip hopsins í leiðinni. Þess vegna ætlum við líka að hafa óvænta viðburði á keppninni, breikdanssýningu hjá 5th Element-hópnum og fleira," segir Ómar. Sex til átta keppendur verða í báðum keppnum. Dagskráin verður þéttari en áður þar sem allt verður tekið upp og sett saman í þátt fyrir PoppTíví. "Í fyrra voru svo margir sem komust ekki að. Til þess að allir geti séð þetta ákváðum við að sýna þetta seinna í sjónvarpinu. Ég hvet alla sem hafa áhuga á tónlist og frumlegum flutningi að mæta." Þetta er í áttunda skipti sem TFA stendur fyrir keppninni en hún var einnig á Unglist í fyrra. Þá sigraði plötusnúðurinn Big Gee í syrpukeppninni, þar sem spila á þriggja til fjögurra mínútna heilsteypta syrpu, Gísli Galdur í skankinu, þar sem plötusnúðurinn skankar sem fjölbreyttust hljóð af einni plötu yfir einn takt, og Bangsi í taktkjaftinum. "Við erum alltaf að reyna að innleiða íslensk orð yfir þetta og heyrum sífellt fleiri nota þau. Þegar ég bar þau undir íslenskusérfræðing hjá Háskólanum samþykkti hann taktkjaft, sagði það málfræðilega rétt. Skank fannst honum ekki virka en við notum það samt." Þeir sem hafa boðað sig til keppni á morgun eru m.a. Gísli Galdur, Nino, Jói, Richard sem var í Quarashi, Hermigervill og Bjartur bítur. TFA stendur ekki aðeins fyrir meistarakeppninni um kvöldið heldur verður einnig klukkan þrjú á morgun kynning á skankskóla, sem fer í gang eftir áramót. Þar verður áhugasömum kennt á græjurnar, menninguna og skankið. Meira um það á heimasíðu TFA, hiphop.is.