Forráðamenn Chelsea æfir

Peter Kenyon, stjórnarformaður Chelsea, segir að forráðamenn félagsins séu æfir vegna þess að Rúmeninn Adrian Mutu var aðeins dæmdur í sjö mánaða keppnisbann af enska knattspyrnusambandinu í gær fyrir hafa orðið uppvís að því að neyta kókaíns. Chelsea rak Mutu frá félaginu í kjölfarið. Kenyon segir dóminn allt of vægan og sendi röng skilaboð hvað varðar ólögleg lyf í enska boltanum. Fulltrúi enska knattspyrnusambandsins vísar þessum ásökunum til föðurhúsanna og bendir á að Rio Ferdinand, leikmaður Man. Utd, hafi verið dæmdur í átta mánaða keppnisbann fyrir að skrópa í lyfjapróf og skilaboðin séu því skýr: að leikmenn sem reyni að komast undan því að fara í lyfjapróf fái harðari refsingu. Rúmenska knattspyrnusambandið ætlar að gera sitt til þess að halda Mutu við efnið í keppnisbanninu og hefur boðað æfingaleik í lok maí þegar leikbann Mutus rennur út.