Tilboð í línumannvirki opnuð í dag

Það ræðst í dag hvaða verktakar munu á næstunni reisa 370 háspennulínumöstur ofan af hálendi til suðvesturhornsins, með tilheyrandi vegalagningu og undirstöðum. Útboðinu er skipt í þrjá áfanga leiðarinnar og verða tilboðin opnuð í dag. Þetta verður enn eitt stórverkið hjá Landsvirkjun, og snýst um byggingu Sultartangalínu - þrjú, frá tengivirki í Sandfelli uppi á hálendi að aðveitustöð Landsvirkjunar á Brennimel í Hvalfirði. Sú leið er um 118 kílómetra löng og er gert ráð fyrir að verktakar leggi vegslóða alla leiðina. Þá er gert ráð fyrir rösklega 600 forsteyptum einingum og að 217 þúsund rúmmetra af efni þurfi í vegslóða og fyllingu undir möstur. Þetta verður eitt af stærstu línumannvirkjum, sem reist hafa verið hér á landi til þessa. Án þess að fréttastofunni sé kunnugt um það, munu erlend sérhæfð fyrirtæki á þesu sviði vafalaust vera í hópi tilboðsgjafa, en það skýrist nánar þegar tilboðin verða opnuð klukan tvö í dag.