Sektaður fyrir ósæmilega hegðun

Sá óvenjulegi atburður varð við aðalmeðferð í opinberu sakamáli í Héraðsdómi Reykjavíkur í gær að dómari greip til þess örþrifaráðs að sekta lögmanninn, sem var verjandi í málinu, um 40 þúsund krónur fyrir ósæmilega hegðun í réttarsalnum. Ingveldur Einarsdóttir héraðsdómari var þá hvað eftir annað búin að reyna að koma vitinu fyrir lögmanninn, Jón Egilsson, sem meðal annars greip ítrekað fram í fyrir vitnum, gerði dómara upp skoðanir og truflaði yfirheyrslur gagnaðiala, sem í þessu tilviki var lögreglustjórinn í Reykjavík, en allt þetta telst ósæmileg framkoma í réttarsal. Samkvæmt heimildum Fréttastofu er þetta í fyrsta sinn sem dómari hefur orðið að sekta verjanda í opinberu máli fyrir Héraðsdómi Reykjavíkur fyrir ósæmilega framkomu, en dæmi munu þó vera um slíkt í einkamálum, en þó afar fá. Sakborningurinn, sem Jón Egilsson var að verja, hlaut fimm mánaða skilorðsbundinn dóm.