Lögreglan tekur ekki skuldarana

Lögreglan hefur ekki sinnt þeim skyldum sínum að handtaka skuldara, sem hunsað hafa boðun sýslumanns, og færa þá til embættisins, að sögn formanns Lögmannafélags Íslands. Hann segir þetta óþolandi með öllu. "Mæti menn ekki í fjárnám þótt þeir séu réttilega boðaðir og finnist ekki hjá þeim skráðar eignir til þess að gera fjárnám í, eru mál sett í lögregluboðun," sagði hann. "Framkvæmd hennar hefur því miður aðeins verið sú að lögreglan hringir í skuldara og boðar til fjárnáms, sem er í sjálfu sér lítil viðbót við fyrri boðun. Lögreglan hefur hins vegar skirrst við að nota heimildir sínar til þess að handtaka fólk og færa til sýslumanns, sem er þó forsenda þess að máli verði lokið. Þetta vita þeir sem skuldseigastir eru og láta sér því fátt um finnast um slíkar kvaðningar," sagði Gunnar enn fremur. "Lögreglan hefur ekki einungis heimild að lögum til þess að handtaka menn og færa þá til sýslumanns vegna aðfarar, henni ber að gera það að boði sýslumanns. Þeirri skyldu hefur hins vegar ekki verið sinnt, ótrúlegt sem það er, og óþolandi með öllu" Gunnar sagði að Lögmannafélaginu hefðu borist erindi frá einstaka lögmönnum vegna þessa ástands. Farið hefði verið yfir málið bæði með embætti sýslumannsins í Reykjavík og fulltrúum dómsmálaráðuneytisins. Menn hefðu vitaskuld áhyggjur af þessu og þetta væri verulega bagalegt með lögaðila sem hefðu haft starfsmenn. Drægist úr hömlu að framkvæma árangurslaust fjárnám hjá slíkum aðilum gætu kröfur glatað rétti til forgangs í þrotabú og réttur gagnvart ábyrgðarsjóði launa gæti einnig glatast. Þessa væru dæmi. "Viðmælendur okkar hjá sýslumannsembættinu og dómsmálaráðuneytinu voru sammála okkur um að vandamálið yrði að leysa og vonandi tekst það. Þá hefur Hæstiréttur einnig lagst á sveif með þeim sem vandamálið vilja leysa, en í dómi frá því í fyrra nr. 90/2003 undirstrikaði hann skyldu lögreglu til þess að verða við boði sýslumanns um að færa menn, sem ekki sinntu kvaðningu, fyrir sýslumann." "Það hefur verið kvartað undan framkvæmd lögreglunnar í þessum efnum," sagði Gunnar Jónsson, formaður Lögmannafélags Íslands, um þær þúsundir aðfararbeiðna sem safnast hafa á hendur skuldara hjá sýslumannsembættinu í Reykjavík.