Segja Heilsugæsluna gera mistök

Formaður Meinatæknafélags Íslands segir Heilsugæsluna í Reykjavík hafa gert mistök með því að leggja niður störf allra meinatækna, með þriggja daga fyrirvara. Forstjóri heilsugæslunnar segir að tólf mánaða biðlaunaréttur þeirra tefji fyrir markmiðum um sparnað. Sjö meinatæknar Heilsugæslunnar í Reykjavík, meða áratuga reynslu, eru uggandi um stöðu sína eftir að ákveðið var að leggja niður störf þeirra, og bjóða þeim í staðinn svipuð störf á Landsspítalanum. Spítalinn og heilsugæslan hafa komist að samkomulagi um að þjónustan haldi alfarið áfram innan spítalans, en við tilfærslu munu meinatæknarnir lækka umtalsvert í launum. Kristín Hafsteinsdóttir, formaður Meinatæknafélags Íslands, segir aðdragandann að þessu mjög sorglegan og klaufalegan og að Heilsugæslan í Reykjavík hafi einfaldlega gert mistök. Hún gagnrýnir að málið skuli ekki hafa verið undirbúið betur. Allt í einu hafi borist bréf 28. júní þar sem öllum er tilkynnt að störf þeirra séu lögð niður strax 1. júlí. Hún segir þetta vera gífurlegt áfall. Flestir meinatæknanna ætla að þiggja biðlaun í allt að tólf mánuði, í samræmi við samninga sem gerðir voru við ríkisstarfsmenn fyrir árið 1996, og ætla því ekki að hefja störf á Landspítalanum. Guðmundur Einarsson, forstjóri Heilsugæslunnar í Reykjavík, segir að sú leið hafi verið valin sem bitni sem minnst á starfsmönnunum, og ljóst sé að biðlaunaréttur þeirra kosti tafir á þeim sparnaði sem reynt sé að ná fram. Aðgerðirnar séu þó nauðsynlegar. Hann segir talsverða hagræðingu í þessari samvinu og mikill sparnaður hljótist þegar til lengri tíma sé litið.