Afgreiðslutími skertur

Afgreiðslutími Landsbókasafns Íslands - Háskólabókasafns verður skertur talsvert í haust. Undanfarin ár hefur verið í gildi samningur milli safnsins og Háskóla Íslands um að Háskólinn borgi hluta af kostnaðinum við að hafa safnið opið fjögur kvöld í viku til klukkan tíu og á sunnudögum. Sem lið í sparnaðaraðgerðum sínum hefur Háskólinn ákveðið að hætta að borga safninu þetta fé. Afgreiðslutími á veturnar verður því til klukkan sjö frá mánudegi fram á fimmtudag en til klukkan fimm frá föstudegi fram á sunnudag. Bókasafnið mun þó lengja afgreiðslutíma þrisvar á ári vegna prófa. Stúdentaráð Háskóla Íslands telur þessa niðurstöðu óásættanlega og segist ætla að beita sér af fullu afli til þess að finna lausn á málinu.