Sjónmengun af majónesdós

"Haldi þetta áfram þá munu auglýsingar við þjóðveginn spretta upp sem gorkúlur og við munum aka um frumskóg af auglýsingaskiltum," segir Steingrímur Gunnarsson leiðsögumaður í samtali við DV í dag um risastóra majónesdós frá Gunnars majónes sem búið er að komna fyrir skammt frá Þjórsárbrú og á að vekja athygli ferðalanga á þessu efni sem gjarnan hleðst utan á Íslendinga, sé þess neytt í óhóflegu magni. Hann segir að risadósinni fylgi sjónmengun og auglýsingar af þessu tagi skemmi ánægju ferðalanga sem vilji njóta þess að ferðast um lítt spillta íslenska náttúru. Hjá Umhverfisstofnun var Helgi Jensson, forstöðumaður fyrir framkvæmda- og eftirlitsvið, fyrir svörum. Hann segir að í lögum um náttúruvernd segi að óheimilt sé að seta upp auglýsingar með vegum eða utan þéttbýlis. "Þetta mál hefur ekki komið inn á borð til okkar. Við erum að vinna í að láta skoða þetta mál og niðurstaðan ræður framhaldinu," segir Helgi.