Möguleiki að afturkalla lögin

Sá möguleiki er fyrir hendi að ríkisstjórnin afturkalli fjölmiðlalögin, og geri þannig þjóðaratkvæðagreiðslu óþarfa. Stjórnarandstaðan segir að ef svo fari, sé hún reiðubúin til samstarfs um að semja nýtt frumvarp. Stjórnarandstaðan vinnur nú að því hörðum höndum að semja sameiginlegt frumvarp um framkvæmd þjóðaratkvæðagreiðslu, og á það að vera tilbúið áður en Alþingi kemur saman, í næstu viku. Össur Skarphéðinsson sagði í samtali við fréttastofuna, í morgun, að frumvarpið væri enn í mótun, en grundvallaratriði í því sé að hafa enga þröskulda. Sá möguleiki er einnig fyrir hendi að þegar alþingi kemur saman eftir helgi, verði fjölmiðlafrumvarpið afturkallað. Sigurður Líndal, lagaprófessor hefur bent á þann möguleika. Í Morgunblaðinu, í dag, nefnir Ólafur Hannibalsson þessa hugmynd, og segir að þá gæfist möguleiki til þess að ná sátt um málið, með því að setja á fót nefnd fulltrúa allra stjórnmálaflokka, og hagsmunaaðila, sem gæfu sér tíma til þess að ná sátt um nýtt frumvarp. Ögmundur Jónasson, þingflokksformaður Vinstri grænna, segir að stjórnarandstaðan myndi fagna því. Þetta yrði til þess að kveða niður illvígar deilur í þjóðfélaginu auk þess sem góðri niðurstöðu væri náð í málinu. Eina vitið sé því að draga lögin til baka og nema þau úr gildi. Þá þyrfti að setjast yfir málið frá grunni og semja nýja löggjöf. Ögmundur sagðist sannfærður um að hægt yrði að ná víðtækri sátt í samfélaginu um bæði vinnubrögðin og lögin. Ögmundur sagði stjórnarandstöðun ekki vera á móti því að setja lög um fjölmiðla. Þau hafi hins vegar alla tíð viljað skoða málin og fara vel yfir þau. Andstaðan vilji fara norsku leiðina sem byggir á því að gefa sér góðan tíma og leita ráða víða í samfélaginu, en það hafi ekki verið gert í þessu tilviki.