Fjöldi flækingsfugla á landinu

Þrjár ryðendur hafa gert sig heimakærar á Hjarðarnesi í Nesjum í rúma viku. Þar fara tveir kvenfuglar og karlfugl sem líklega eru ársamlir, segir Brynjúlfur Brynjólfsson, formaður félags fuglaáhugamanna á Hornafirði. Síðast sást til ryðandapars á landinu árið 1999. Fjöldi sjaldseðra flækingsfugla hafa haft viðkomu á landinu í vor. Brynjúlfur segir ekkert því til fyrirstöðu að fuglar sem komi til landsins á vorin lifi það af til haustinn eða skili sér út aftur. "En flækingar á haustinn. Það eru miklar líkur á að stór hluti þeirra drepist." Brynjúlfur segir að talið sé að allar ryðendur sem sjáist á Vesturlöndum séu annað hvort úr andagörðum eða komi frá heimkynnum sínum sem eru á svæði frá Norð-Vestur Afríku, Grikklandi til Austur-Kína. Árið1892 komu sjö ryðendur til landsins. "Þá var stór ganga yfir alla Evrópu og þessi andagarðar ekki orðnir eins algengir," segir Brynjólfur og bætir við að talið sé öruggt að þær hafi komið frá heimkynnum sínum. Jóhann Óli Hilmarsson, fuglafræðingur og ljósmyndari, segir að í síðustu viku hafi grænhegri einnig sést í annað sinn á Íslandi. Hann hafi skotið upp kollinum við Gerði í Suðursveit 28. maí. "Grænhegrar eru mjög sérstakir útlits og lifa eingöngu í Ameríku. Heimafólk á bænum kom auga á hegrann en sérfræðingar fóru á staðinn og greindu fuglinn," segir Jóhann Óli. Brynjólfur bætir því við að grænhegri hafi aðeins einu sinni sést í Frakklandi og fjórum sinnum á Bretlandseyjum. Þá hafi sést til tveggja bjarthegra, annar var í Grindavík og hinn á Stokkseyri. "Bjarthegrinn er lítill og hvítur. Hann verpir aðallega í Frakklandi og á Spáni en hefur gert vart við sig á Bretlandseyjum á undanförnum árum," segir Jóhann Óli. Tíunda tígulþernan sást við Litla Hraun á Eyrarbakka en meðal annarra ótíðra gesta vorsins má nefna hvíta hegra, amerískan hrísastelk, laufglóa, kvöldlóu og líklega alpasvölung, segja Jóhann Óli og Brynjólfur.