ÖBÍ leitar að tillögum

Þessa dagana leitar Arnþór Helgason, framkvæmdastjóri Öryrkjabandalags Íslands, að tilnefningum til aðgengisverðlauna samráðsvettvangs Norrænu ráðherranefndarinnar um málefni fatlaðra (NSH). Verðlaunaafhending NSH er árviss viðburður, en að þessu sinni er sjónum beint að upplýsingasamfélaginu. "Ég er fulltrúi Íslands í dómnefndinni og tek við tillögum hvaðan sem er," segir Arnþór og mælist til að fá tillögur sendar á tölvupóstfangið frkvstj@obi.is. "Helst er verið að leita að ýmiskonar tæknibúnaði, eða upplýsingakerfi sem nýtist fólki í upplýsingasamfélagi nútímans og tekur sérstaklega mið af þörfum fatlaðra." Sem dæmi nefnir Arnþór upplýsingakerfi ferðamála, heimasíður, tæknibúnað í tengslum við hvers konar fjarskipti, farsíma, GPS-tæki, og fleira. "Skilyrðið er fyrst og fremst að við hönnun búnaðarins séu höfð að leiðarljósi markmið um að því sem næst allir geti nýtt sér hann, segir Arnþór, en tilnefningar vill hann fá til sín fyrir 15. næsta mánaðar.