Ákæra fyrir líkamsárás þingfest

Ákæra gegn tveimur bræðrum fyrir alvarlega líkamsárás var þingfest fyrir Héraðsdómi Reykjavíkur í morgun. Bræðurnir, sem eru á þrítugsaldri, eru sakaðir um að hafa í ágústlok á síðasta ári ráðist að manni í Tryggvagötu í Reykjavík. Öðrum bræðranna er gefið að sök að hafa sparkað í manninn svo hann féll í götuna og sparkað í líkama hans, og hinum að hafa veist að honum liggjandi með spörkum í höfuð og líkama og stigið á höfuð mannsins. Fórnarlambið missti meðvitund við árásina, fékk blóðgúl yfir hægra auga, heilahristing og margs konar aðra áverka á höfði. Árásin telst hættuleg og varða við 218. grein almennra hegningarlaga en viðurlög við slíku eru fangelsi allt að þremur árum, og allt að 16 árum ef stórfellt líkams- eða heilsutjón hlýst af, vopn eru notuð eða bani hlýst af. Bræðurnir neituðu báðir sök við þingfestingu málsins fyrir Héraðsdómi Reykjavíkur í morgun og verður málið tekið fyrir í haust.