Menningarmálanefnd geri athugasemd

Prestur innflytjenda á Íslandi segir það alvarlegt að Þjóðdansafélag Reykjavíkur neiti að lána blökkukonu þjóðbúning til myndatöku á forsíðu blaðs, vegna litarháttar hennar. Hann vill að Menningarmálanefnd Reykjavíkurborgar geri formlega athugasemd við félagið. Ritstjóri Reykjavík Grapevine ákvað að tákngera fjölbreytileka íslenska samfélagsins á forsíðu nýjasta tölublaðsins með því að fá svarta konu til að skrýðast íslenska þjóðbúningnum. Þjóðdansafélag Reykjavíkur neitaði að lána búninga sína til myndatöku, vegna litarháttar konunnar og sagði talsmaður Þjóðdansafélagsins í samtali við fréttastofu í gær að hann væri ósammála ritstjóranum um að myndin táknaði framtíð Íslands. Hún væri ekki svört, og bætti við að ef eitthvað væri, þá væri hún frekar gul. Prestur innflytjenda á Íslandi, Toshiki Toma, er undrandi á þessari afstöðu Þjóðdansafélagsins því yfirleitt séu Íslendingar jákvæðir þegar innflytjendur reyni að nálgast íslenska menningu. Hann segir það alvarlegt að fulltrúi félags á borð við Þjóðdansafélagið lýsi slíkri afstöðu í garð innflytjenda og telur fulla ástæðu til að Menningarmálanefnd Reykjavíkurborgar geri formlega athugasemd við afstöðu félagsins vegna þessa máls. Þetta sé nefnilega ekki bara mál sem snerti útlendinga heldur stefnu borgarinnar.  Toshiki segist greina nokkurn mun á afstöðu eldra fólks og ungs fólks í garð innflytjenda. Afstaða eldra fólks mótist oft af ótta við að of margir útlendingar flytji hingað til lands og breyti með því ímynd þjóðarinnar. Það sé hins vegar óumflýjanleg þróun og hann segir að allir Íslendingar, hvítir, gulir og svartir, fagni þjóðhátíðardeginum af sömu gleði.