KB banki sýknaður í Héraðsdómi

Kaupþing-Búnaðarbanki var í dag sýknaður af kröfu fyrrverandi vaktmanns í bankanum sem sagt var upp vegna gruns um að leka trúnaðarupplýsingum úr bankanum. Maðurinn lá undir grun um að hafa lekið upplýsingum til Norðurljósa um að Búnaðarbankinn ætti í viðræðum við aðila um yfirtöku á fyrirtækinu og að bankinn hafi þar rofið trúnað við Norðurljós. Málið var kært til Fjármálaeftirlitsins sem úrskurðaði að bankinn hefði brotið gegn bankaleynd. Grunur lék á að vaktmaðurinn hefði lekið upplýsingunum til Norðurljósa og var sett upp gildra fyrir hann með því að láta liggja á borði bankastjóra skjal merkt trúnaðarmál og hafði myndavél verið komið fyrir inni á skrifstofunni. Þar sást vaktmaðurinn skoða skjalið, fara með það til ljósritunar og þurrka af því fingraför. Héraðsdómur taldi sannað að vaktmaðurinn hefði brugðist trausti vinnuveitenda síns og ekki skipti máli þótt ekki sé sannað að hann hafi komið umræddum gögnum til annarra. Bankinn var því sýknaður af rúmlega fimm milljóna króna bótakröfu mannsins.