Dregið úr framleiðslutengingu

Í nýjum mjólkursamningi sem landbúnaðarráðuneytið hefur gert við kúabændur og tekur gildi á næsta ári er dregið úr framleiðslutengdum greiðslum. Að sögn Ólafs Friðrikssonar, skrifstofustjóra skrifstofu framleiðslu- og markaðsmála í Landbúnaðarráðuneytinu, er það að hluta til gert til að bregðast við kröfum sem viðbúið sé að komi frá Alþjóðaviðskiptastofnuninni (WTO). "Gildandi samningur er að fullu framleiðslutengdur. Líklegt er að í næsta samningi við WTO verði menn að draga úr þessari framleiðslutengingu, þannig að það verði frekar fært yfir í minna framleiðslutengdan stuðning," sagði hann og vísaði til viðræðna sem nú væru í gangi við Alþjóðaviðskiptastofnunina. Ólafur segir að í nýjum mjólkursamningi sé engu að síður gert ráð fyrir að 80 prósent greiðslna til bænda verði áfram framleiðslutengdar. Fastar óframleiðslutengdargreiðslur fyrir hvern grip lækki svo í hlutfalli við aukinn fjölda gripa umfram 40, þannig að ekki verður greitt með fleiri gripum en 100 á hverju búi. Ekki mun því borga sig að halda upp á gripi til þess eins að fá af þeim styrk. Fullur styrkur af hverjum grip nemur um 16 þúsund krónum á ári og samkvæmt heimildum blaðsins mun sú upphæð ekki duga fyrir fóðri í skepnuna allt árið.