Frestað að setja út rekald

Slysavarnafélagið Landsbjörg hefur frestað því vegna veðurs, að setja út rekald við Presthúsatanga á Kjalarnesi til að kanna hvert líkið af Sri Ramawati hefur hugsanlega rekið. Vitað er að lík af fólki, sem farið hefur í sjóinn við Kjalarnes hefur rekið á fjörur vestur á Mýrum og jafnvel á Snæfellsnesi. Með því að fylgjast með rekaldi, eins og til stendur, vonast björgunarmenn til þess að fá vísbendingar um hvar vænlegast sé að leita á ný. Umfangsmikilli leit 130 björgunarsveitarmanna að líkinu, á landi og sjó, lauk í gærkvöldi án árangurs, en fyrr um kvöldið köfuðu kafarar lögreglunnar. Mikill botngróður gerði þeim erfitt fyrir og svo vaxandi öldugangur. Fyrrverandi sambýlismaður hennar játaði í gær að hafa ráðið henni bana á heimili sínu, en í fyrradag vísaði hann á staðinn á Kjarnesi, þar sem hann varpaði líki hennar í sjóinn. Sterkir hafstraumar eru á þeim slóðum og er nú talið ólíklegt að líkið finnist þar í grennd.