Lítið vantar uppá á hótel Búðum

Hótelstjórinn á Búðum segir óeðlilegt að gistiheimili fái rekstrarleyfi séu brunavarnir ófullnægjandi. Síðasta vetur voru settar upp eldvarnahurðir á hótelinu en eftir er að setja upp handrið á þaki þess. Í fréttum Stöðvar 2 undanfarna daga hefur verið farið yfir úttekt Brunamálastofnunar á framhaldsskólum og gistiheimilum. Fram hefur komið að ástand brunavarna fékk næstlægstu einkunn, slæmt, á nærri helmingi gistihúsa í fyrra. Á tveimur þriðju hluta gistiheimila var staðan óbreytt í byrjun júlí þrátt fyrir að sums staðar sé byrjað að vinna að endurbótum. Á Hóteli Búðum, sem var endubyggt eftir að það brann fyrir þremur árum, fá brunavarnir einkunnina sæmilegt, sem þýðir að brunvarnir eru í lagi í aðalatriðum. Sigurður Skúli Bárðarson, hótelstjóri, er sammála því sem Ferðaþjónusta bænda og Samtök ferðaþjónustunnar hafa sagt í fréttum að gistihús sem ekki uppfylli kröfur um brunavarnir eigi ekki að fá rekstrarleyfi. Hann segist ekki hafa fengið greinargóð svör við þeirri spurningu af hverju rekstarleyfi séu veitt án þess að brunavarnir séu fullnægjandi. Brunamálastjóri hefur sagt að hann vilji vinna með eigendum gistiheimila að lausn mála í stað þess að loka hjá þeim. Hótelstjórinn á Búðum segir það færast í aukana að stórar ferðaskrifstofur biðji um staðfestingar á öllum leyfum þegar pantanir eru gerðar. Sigurður kom sjálfur að rekstri hótelsins á Búðum í apríl og að lítið vanti uppá að brunavarnir séu fullnægjandi. Í nýrri úttekt Brunamálastofnunar segir að á Hótel Búðum sé brunakerfi komið í lag, búið er að hólfa borðasal og eldhús með eldvarnarhurðum og eru flóttaleiðir í samræmi við teikningu. Það eina sem stendur út af borðinu svo Hótel Búðir fá einkunnina ágætt og uppfylli kröfur byggingareglugerðar um brunavarnir er, að það á eftir að setja upp handrið á þaki hússins, til að varna því að fólk sem flýr þangað verði sér að voða.