Með ísbjörn í fiskbúðinni

"Þetta er fyrst og fremst gert til að draga að athygli. Fiskikóngurinn verður alltaf að vera með kónginn," segir Kristján Berg, fisksali sem hefur komið uppstoppuðum ísbirni fyrir í búðarglugga í Fiskbúðinni Vör. Björninn fékk Kristján frá Grænlandi en hann hefur leitað mánuðum saman að hentugu dýri. "Það er svo erfitt að finna ísbjörn með allar klær heilar," segir Kristján og upplýsir að verðið á ísbirni sé á við verðið á notuðum bíl. Kristján lýsir upp búðina um nætur svo að fólk geti litið björninn augum og segir að margir komi við á kvöldin til að sjá hann. "Þetta er eins og jólaskraut, ég held að fullorðna fólkið sé meira að segja spenntara fyrir þessu en krakkarnir." Kristján kveðst hafa langað í ísbjörn árum saman. "Það eru margir sem vilja eiga hlébarða, hann myndi ekki passa vel inn í fiskbúð. Ég var líka að spá í hval en hann tæki sennilega of mikið pláss," segir Kristján og hlær.