Mikilvægt að ráðast að rótunum

Fjölmargir bankastarfsmenn hafa orðið fyrir áreiti og nærri tíundi hver hefur orðið fyrir einelti í starfi. Ný reglugerð skyldar vinnuveitendur til að uppræta einelti á vinnustað. Hvað er einelti? Guðbjörg Linda Rafnsdóttir, félagsfræðingur hjá Vinnueftirlitinu, segir að einelti sé síendurtekin, ótilhlýðileg og ámælisverð hegðun sem niðurlægir, gerir lítið úr, móðgar, særir eða mismunar og veldur vanlíðan hjá þeim sem fyrir verður. Einelti er alltaf huglæg upplifun þannig að einstaklingur getur mjög auðveldlega upplifað það að hann sé lagður í einelti án þess að þeir sem í kringum hann eru geri sér grein fyrir því að viðkomandi finnist hann síendurtekið verða fyrir særandi og meiðandi framkomu. Hvernig á að bregðast við einelti? Atvinnurekendur bera ábyrgð á því að uppræta einelti. Ef starfsmaður upplifir einelti þarf að taka það alvarlega. Mikilvægt er að á vinnustaðnum séu skilgreindir aðilar sem hægt er að leita til, ekki endilega næsti yfirmaður eða starfsmannastjóri heldur einstaklingar sem fyrirtækið hefur fengið það hlutverk að taka á móti ábendingum af þessum toga til að geta grafist fyrir um réttmæti þeirra og vinda ofan af slíkri hegðun. Hvernig nákvæmlega á að bregðast við fer að hluta til eftir því hvað hefur orðið til þess að slíkt ástand kemur upp. Oft er einelti liður í annarri vanlíðan. Þetta þarf að skoða og finna hvað veldur samskiptavandamálum á vinnustaðnum til að hægt sé að ráðast að rótum vandans og einstaklingnum fari að líða betur.