Þessi mynd er skíturinn

"Það er ekki komið nafn á hana ennþá. Nokkrar tillaganna eru Rokkræningjarnir, Pilots of Purple og Börn ógæfunnar," segir Frosti Runólfsson, sem prýðir forsíðu Fókus, sem fylgir með DV í dag. Frosti er að leggja lokahönd á heimildarmynd um Mínus. Hann skilar öllu litrófi sveitarinnar, upphafinu, upphefðinu, fylleríinu og einlægninni. Samstarfsmaður Frosta er Haraldur Sigurðsson klippari en myndarinnar er vægast sagt beðið með eftirvæntingu. Neitar ekki fylleríinu Á nýafstaðinni Nordisk Panorama kvikmyndahátíð var mynd Frosta til sýningar. "Það var afar gróft klipp. Við fengum krítík áhorfenda, sem var gott. Síðan breyttum við henni og styttum. Nú flæðir myndin betur. Næsta mál á dagskrá er að vinna hljóðið." Myndin um Mínus fylgir hljómsveitinni allt frá byrjun til dagsins í dag. Frosti hefur tekið upp í rúm þrjú ár en auk þess létu meðlimir og vinir þeirra hann fá annað og eldra efni. Fyrr á árinu fylgdi hann Mínus á tónleikaferðalagi um Bretland. Aðspurður um fylleríið og vitleysuna segir hann það allt vissulega vera til staðar. "Ég væri að ljúga ef ég neitaði því. En það er samt allt á góðu nótunum. Það er ekki skrýtið að drykkja fylgi þessu öllu. Hljómsveitinni er t.d. stundum réttur bjórkassi eftir góða tónleika. En ég myndi segja að þetta sé mynd um fimm mismunandi einstaklinga sem hafa sama takmark. Síðan er fylgst með því hvernig þeir ná þessu takmarki." Í viðtalinu í Fókus segir Frosti einnig frá annarri mynd sem hann er að gera um útvarpsmanninn Freysa og hinn vægast sagt litríka hóp sem hann hefur safnað í kringum sig. Frosti vinnur einnig að polaroid-bók um mafíuna sína, sem telur hundrað manns, heimildarmyndinni Dogma, sem hann tók upp með mömmu sinni þegar þau jörðuðu heimilishundinn í Flókadal og mynd um vinnuferli Gabríelu við Bjarkarmyndband. Hann er líka í hljómsveitinni Klink, ásamt bassafantinum Þresti Johnny Jónssyni í Mínus. Allt þetta og miklu meira í Fókus, sem fylgir DV í dag.