Fókus er kominn

Já, það er gleðidagur fyrir alla sem kaupa sér DV í dag. Tímaritið Fókus fylgir með, þeim til ómældrar ánægju. Þar er, líkt og alltaf, af nógu að taka: Valin eru bestu og verstu plötuumslögin. Alls komast 41 umslög á listana tvo. Mugison, Jón Ólafsson, Múm, Björn Thoroddsen, Solid i.v., Gummi Jóns, Brain Police, Þrjár systur. Hvar ætli þetta fólk sé á fagurfræðiskalanum? Miðopnan í Fókus er undirlögð undir þetta þar sem átta álitsgjafar skera út um það. Þeir eru Birgir Örn Thoroddsen Curver, Bjaddni Hell grafíker, Egill Harðar grafíker, Freyr Eyjólfsson popplandari, Helga Óskarsdóttir myndlistarmaður, Katrín.is, Magga Hugrún blaðamaður, Sigrún í Gjörningaklúbbnum og Grjóni Kjartans Tvíhöfði. Kristján Eggertsson fer fyrir hljómsveitinni Delicia Mini í Danmörku. Hún gaf nýlega út sína fyrstu plötu, Skuggi. Fjölmiðlarnir úti, Politiken, Gaffa, Danmarks Radio, P3, allir taka þeim opnum örmum. Gefa plötunni toppdóma og setja lögin efst á spilunarlistana. Kristján segir Fókus aðeins frá ævintýrinu. Frosti Runólfsson prýðir forsíðuna að þessu sinni. Hann segir frá heimildarmyndunum sínum um Mínus, útvarpsmanninn Freysa, dauða fjölskylduhundsins og gerð myndbands Gabríelu fyrir Björk. Frosti vinnur einnig að polaroid-bók um mafíuna sína, er í hljómsveitinni Klink og segir frá því hvernig geðklofa maður ýtti honum úr vör í bíóheimum. Einnig er viðtal við fyrirsætuna Þóru Lind Möller. Hún býr í Chicago, var eitt sinn valin Miss Colorado og vinnur fyrir sér þessa dagana í bikini í glergámi í frostinu. Þar sparkar hún í sundbolta til að reyna að lokka fólk til að kaupa sér ferð til Mexíkó. Hljómsveitin Jagúar er að gefa út sína þriðju plötu, Hello Somebody. Börkur gítarleikari lýsir því hvernig presturinn Gregory í lítilli babtistakirkju í Harlem opnaði augu drengjanna fyrir fátækt og því hversu ömurlegt messuhald lúthersmanna í Evrópu er. Þeir eru komnir með nýjan umboðsmann, einkavin Stevie Wonder. Strákarnir í Hæstu hendinni eru hæstánægðir með nýju plötuna sína. Unnar og Erpur, U-Fresh og BlazRoca söfnuðu saman nokkrum af helstu röppurum Norðurlanda til að rappa með sér. Unnar leynir á sér, er menntaður hagfræðingur, giftur, rekur fyrirtæki í Kaupmannahöfn og var eitt sinn þungavigtarboxari. ... ALLT ÞETTA OG MIKLU MIKLU MEIRA í Fókus, sem fylgir DV í dag.