Fái greitt búsetugjald mánaðarlega

Nefnd á vegum Byggðastofnunar leggur til að íbúar í Árneshreppi fái mánaðarlega greitt sérstakt búsetugjald. Rafmagn verði niðurgreitt og sérstökum aflaheimildum úthlutað til hreppsins sem verður svo deilt á milli útgerðarmanna á svæðinu. Nefndinni var ætlað árið 2003 að gera tillögur um verndun búsetu og mannlífs í Árnesi á Ströndum en þar búa um fimmtíu og sex einstaklingar. Valgerður Sverrisdóttir iðnaðarráðherra fól Byggðastofnun að skipa nefndina sem átti að skila af sér í vor. Forsætisráðherra gerði grein fyrir tillögum nefndarinnar í fyrirspurnartíma á Alþingi í gær. Lagt er til að strax verði teknar upp sérstakar búsetugreiðslur til þeirra sem búi í Árneshreppi. Greiðslan eigi að nema sextíu prósentum af persónuafslætti sem greiðist mánaðarlega til allra einstaklinga sextán ára og eldri. Þá eru tillögur um niðurgreitt rafmagn sem einnig nái til sumarhúsaeigenda. Þá leggur nefndin til að Sjávarútvegsráðuneytið úthluti aflaheimildum til hreppsins sem hreppsnefndin úthluti til útgerðarmanna á svæðinu. Þá vill nefndin einnig að unnið verði að sértækum markaðsaðgerðum með sauðfjárafurðir úr Árneshreppi. Og síðast en ekki síst að komið verði upp fullkominni aðstöðu til fjarnáms í Finnbogastaðaskóla með myndfundabúnaði og tengingu við háhraðanet framhaldsskólana til að nota við kennslu í grunnskólanum og fræðslu til almennings. Halldór Ásgrímsson, forsætisráðherra, segir sumt í tillögunum umdeilanlegt en leggur til að lögð verði áhersla á vegaumbætur og fjarnám. Hann segir að tillögur sem varði grundvallarbreytingar á skattalögum þurfi mun meiri umræðu og umhugsun. Eins sérstaka úthlutun á fiskveiðiheimildum, til viðbótar við þær sérreglur sem settar hafi verið um þau mál. Hann segist hafa dregið það fram að þau atriði ættu ekki að þurfa að tefja fyrir þessu máli að öðru leyti.