Samningar í höfn

Kennaradeilan er leyst og var skrifað undir samning fyrir stundu. Samningurinn gildir til maíloka 2008. Laun kennara hækka um 5,5 prósent strax og þeir fá 130 þúsund króna eingreiðslu. Eiríkur Jónsson, formaður Kennarasambands Íslands, vill ekki ræða heildarlaunahækkun kennara, en segir að ekki hafi verið lengra komist og að gerðardómur hefði verið verri kostur. Eiríkur segir að sú ákvörðun hafi verið tekin að reyna að betrumbæta ákveðna hluti úr eldri tillögu, þar sem Gerðardómur hefði verið afleitur kostur fyrir kennara. Það væri betri kostur að taka þessum samningi en að fara með málið í Gerðardóm og því verði lagt til við félagsmenn að samþykkja samninginn. Eiríkur segir alveg ljóst að það sem kennarar hafi í höndunum nú sé allt annað en það sem blasti við þeim áður en farið var í verkfall. Hann segir að samningurinn hafi verið gerður við afar erfiðar aðstæður, bæði með tilliti til lagasetningarinnar og hugsanlega að málið yrði sett í Gerðardóm. Sú leið sem farin hafi verið nú tryggi að kennarar og aðrir opinberir starfsmenn hafi enn frelsi til að semja án þess að hafa Gerðardóm hangandi yfir sér. Birgir Björn Sigurjónsson, formaður samninganefndar sveitafélaganna, segir að málið blasi eins við sveitarfélögunum eins og kennurum. Staðið hafi verið frammi fyrir þeirri staðreynd að mikið hafi legið á að koma skólastarfi af stað á ný og Gerðardómur hafi ekki verið leið sem menn hafi viljað að yrði farin. Hann segist telja að tilfinningar sveitarfélagsmanna til samningsins sé eflaust mjög blendin, enda sé samningurinn dýr. Hins vegar muni menn meta þessa ákvörðun sem þá réttu, þegar fórnarkostnaðurinn sé skoðaður.