Þurfa að greiða 73 milljónir

Kvikmyndafyrirtækið Sögn hefur verið dæmt til að greiða Síldarvinnslunni í Neskaupstað rúmlega 73 milljónir króna í bætur vegna bruna á frystihúsi félagsins við upptökur á kvikmyndinni Hafið. Kvikmyndin Hafið var tekin upp síðla árs 2001. Þann 7. desember það ár var tekið upp atriði þar sem líta átti út sem stór bygging stæði í ljósum logum. Atriðið varð hins vegar með meiri raunveruleikablæ en til stóð því byggingin, frystihús Síldarvinnslunnar, brann nánast til kaldra kola. Síldarvinnslan fór í mál, bæði við tryggingarfélag sitt Tryggingamiðstöðina, sem og Sögn ehf., en aðstandendur þess framleiddu myndina. Þar var í forsvari leikstjóri myndarinnar Baltasar Kormákur. Tryggingamiðstöðin var sýknuð af bótakröfum þar sem héraðsdómur telur sýnt að sviðsetning eldsvoða í húsnæði falli ekki undir eðlilega starfsemi og tjónahættu og því hefði þurft að tilkynna Tryggingamiðstöðinni slíkt sérstaklega áður, svo tryggingin héldi gildi sínu. Dómurinn telur hins vegar að ábyrgðin liggi hjá kvikmyndafyrirtækinu Sögn. Í dóminum kemur fram að mjög hvasst var kvöldið sem eldsvoðaatriðið var tekið upp. Vitnum sem kom fyrir dóminn kom þó engan veginn saman um hvenær vind hefði lægt og hversu mikið. Í dóminum segir að ákvörðun um tökur á brunaatriðinu hafi verið óvarleg og gáleysisleg og að forsvarsmenn kvikmyndafyrirtækisins beri ábyrgði á þeirri ákvörðun. Yfirgnæfandi líkur þykja á að bruninn hafi orðið vegna óhagstæðra veðurskilyrða sem hefði þar af leiðandi mátt koma í veg fyrir. Dómurinn dæmir Sögn ehf. því til að greiða Síldarvinnslunni 73 milljónir og 400 þúsund krónur í skaðabætur.