Ætlaði aftur á staðinn

Danski hermaðurinn sem lést á veitingahúsi á laugardagskvöld, lést af völdum heilablæðingar, vegna hnefahöggs efst við kjálkabarð. Þegar sá sem höggið veitti frétti hversu alvarlegar afleiðingar þess voru, ætlaði hann aftur á vettvang, en lögreglan handtók hann við heimili hans. Bráðabirgðaniðurstaða krufningar á Flemming Tolstrup lá fyrir í dag. Hún er sú að hann hafi látist af völdum heilablæðingar. Blæðingin er afleiðing hnefahöggs sem hann hlaut efst á háls við hægra kjálkabarð. Sá sem veitti honum höggið er Scott Ramsay, skoskur knattspyrnumaður sem búsettur hefur verið hér á landi um árabil. Að sögn lögmanns hans játaði skjólstæðingur hans strax að hafa slegið Danann, en honum var ekki sleppt fyrr en að loknum skýrslutökum. Lögmanni hans finnst líklegast að skjólstæðingur hans verði ákærður samkvæmt annarri málsgrein 218. grein hegingarlaga. En þar segir meðal annars að ef bani hlýst af atlögu geti legið við allt að 16 ára fangelsi. Lögmaðurinn vonast til að dómari muni líta til þess að enginn ásetningur var með árásinni og að dómur verði hugsanlega skilorðsbundinn, enda sé fordæmi fyrir slíku vegna alvarlegra átaka. Hann segir skjólstæðing sínum líða illa, hann kenni sjálfum sér um og hugur hans sé hjá ástvinum hins látna. Samkvæmt lögmanni Scotts Ramsays, hringdi vinur Ramsays í hann þegar sjúkrabíll hafði verið kvaddur á vettvang og gerði hann sér þá grein fyrir því hversu alvarlegt málið var. Hann ætlaði því á vettvang og var á leið þangað þegar lögreglan handtók hann.