Ferðin var óþörf

Yfirmannaskipti verða á flugvellinum í Kabúl á miðvikudag. Hallgrímur Sigurðsson hverfur þá frá störfum og kemur til Íslands. Hann lauk teppakaupum sínum á flugvellinum á meðan undirmenn hans lágu í sárum á sjúkrahúsi. Unnustur og eiginkonur friðargæsluliðanna sem lentu í lífsháska á Kjúklingastræti í Kabúl í Afghanistan sendu frá sér yfirlýsingu í gær. Það var mat þeirra og manna þeirra að umræðan um þá og þá sér í lagi boli sem þeir íklæddust við heimkomuna væri á villigötum. „Shit happens" væru ummæli sem Hallgrímur Sigurðsson viðhafði þegar hann lauk máli sínu eftir að hafa útskýrt leiðangurinn til teppakaupmannsins. Samkvæmt upplýsingum fréttastofu hafði friðargæsluliðunum ekki verið bannað að tjá sig en þeir kusu að upplýsa ekki um tilgang þess að íklæðast bolunum við heimkomuna. Fréttastofa stöðvar Tvö spurði engu að síður mjög ákveðið í Leifstöð hvort ekki fælist í bolunum ádeila á yfirmenn þeirra. Af gefnu tilefni skal frá því greint að Bein þýðing „shit happens," er skítur skeður, en meiningin er meira í ætt við að þetta hafi verið eins og hvert annað hundsbit. Garðar Forberg tekur við stjórnun flugvallarins í Kabúl á miðvikudag en hann stjórnaði áður flugvellinum í Pristina þegar íslendingar sáu um rekstur flugvallarins þar. Ekki er áformað að Hallgrímur Sigurðsson taki að sér fleiri störf innan utanríkisþjónustunnar á næstunni. Þær upplýsingar fengust í utanríkisráðuneytinu að allar skýrslur og greinargerðir um atvikið í Kabúl hefðu verið skrifaðar. Rannsókn málsins væri að fullu lokið. Það hefur þó ekki komið fram áður að á meðan Stefán, Steinar Örn og Sverrir Haukur lágu á sjúkrahúsi eftir árásina fékk Hallgrímur teppakaupmanninn úr Kjúklingastræti til þess að koma með sýnishorn af teppum á flugvöllinn og kláraði þar með kaup sín. Þetta er staðreynd sem sýnir svo ekki verður um villst að ferðin í Kjúklingastræti með hörmulegum afleiðingum sínum var óþörf.