Morð í Keflavík?

Lögreglan í Keflavík rannsakar andlát dansks hermanns í nótt og er útlendingur í haldi lögreglu, grunaður um að vera valdur að láti hans. Í fréttatilkynningu frá lögreglunni í Keflavík kemur fram að henni hafi verið tilkynnt um það laust upp úr klukkan fjögur í nótt að danskur hermaður væri slasaður á veitingastað í Keflavík. Maðurinn var fluttur meðvitundarlaus á Heilbrigðisstofnun Suðurnesja þar sem hann lést skömmu síðar. Vitni segja að hann hafi verið sleginn af einum gesta staðarins. Í tilkynningu frá lögreglu segir að hinn látni hafi verið 33 ára gamall danskur hermaður sem kom til landsins í gærkvöldi með herflugvél danska hersins og gisti ásamt félögum í flugáhöfninni á hóteli í Keflavík. Í gærkvöldi mun hann hafa farið með félögum sínum út að skemmta sér í miðbæ Keflavíkur.  Atburðurinn átti sér stað á veitingastaðnum Traffic, Hafnargötu 30, Keflavík. Að sögn vitna gerðist atburðurinn framan við bar veitingastaðarins. Hinn grunaði mun hafa slegið hinn látna einu höggi á höfuðið og farið síðan rakleitt út af veitingastaðnum. Hann er 29 ára gamall breskur ríkisborgari sem er búsettur hér á landi og var hann handtekinn á heimili sínu skömmu síðar. Virtist hann þá talsvert mikið ölvaður. Þegar lögregla kom á staðinn var búið að færa hinn látna inn í starfsmannaðstöðu skemmtistaðarins þar sem sjúkraflutningamenn voru að gera á manninum endurlífgunartilraunir. Ekkert blóð var sjáanlegt á vettvangi eða á hinum látna, en nákvæm rannsókn á vettvangi hefur ekki farið fram. Í tilkynningu lögreglu segir að málið sé á frumrannsóknarstigi og ekki hægt að gefa nánari upplýsingar um atburðinn fyrr en eftir helgina.