Krefjast hærri launa en læknar

Unglæknar benda á kennarar séu að krefjast hærri byrjunarlauna eftir þriggja ára háskólanám, en læknar hafa eftir sex ára háskólanám. Bjarni Þór Eyvindsson, formaður Félags ungra lækna, skrifar í 11. tölublað Læknablaðsins um kjör kennara og lækna. Hann segir kröfugerð kennara hafa vakið áhuga sinn, einkum umræðan um hvað sé réttlátt að hafa í laun eftir þriggja ára háskólanám. Kennarar hafa talið það réttlátt að nýútskrifaður kennari sem lokið hefur þriggja ára háskólanámi sé með 250.000 kr. í grunnlaun. Bjarni ber þetta saman við nýútskrifaðan kandítat eftir sex ára háskólanám sem hefur 204.000 í grunnlaun. Eftir að hafa lokið ársvinnu og með veitingu lækningaleyfis fara grunnlaunin upp í 234.000. Bjarni reiknar út að kennarar séu að fara fram á um 50 þúsund krónur í hækkun fyrir hvert ár í háskólanámi. Ef þessari reikningsformúlu yrði beitt fyrir lækna væri launakrafa unglækna við næstu kjarasamninga fjögur hundruð þúsund á mánuði. Bjarni Þór endar grein sína með því að lýsa fullum stuðningi við launabaráttu kennara og óskar eftir því að fá sama stuðning þegar kemur að kjaraviðræðum lækna næsta vetur.