Atkvæðagreiðslu lýkur klukkan eitt

Það ræðst síðdegis í dag hvort miðlunartillaga ríkissáttasemjara í kennaradeilunni verður samþykkt eða felld og þá hvort verkfall kennara í grunnskólum hefst á ný í fyrramálið eða verður aflýst. Frestur til að skila inn atkvæðum rennur út klukkan eitt og talning atkvæða um tillöguna hefst þá strax hjá ríkissáttasemjara. Fulltrúar beggja deilenda munu fylgjast með talningunni og er stefnt að því að henni ljúki fyrir klkukkan sex í dag. 4.986 kennarar eru á kjörskrá og er þátttaka mjög góð að sögn skrifstofu sáttasemjara. Reyndar er það vaninn þegar kennarar greiða atkvæði um samninga sína. Launanefnd sveitarfélaga kom saman til fundar í gærkvöldi og fer ekki sögum af þeim fundi. Hún kom aftur saman klukkkan tíu í húsakynnum ríkisáttasemjara til að taka afstöðu til þess hvort hún fellir eða samþykkir tillöguna. Ekki verður tilkynnt um það fyrr en eftir klukkan eitt, að atkvæðagreisðlu kennara lokinni.