Vetrarfrí lagt niður

Fræðsluráð Reykjavíkur samþykkti á fundi sínum í dag að leggja niður vetrarfrí, sem átti að hefjast í næstu viku, þannig að skólastarf yrði með eðlilegum hætti. Formaður Félags grunnskólakennara segir að kennsla í vetrarfríinu kalli á yfirvinnugreiðslu til kennara. Fræðsluráð kom saman til fundar til að ræða stöðuna í málefnum grunnskólanna. Ráðið ákvað að mælast til þess að fallið yrði frá því að hafa vetrarfrí í skólunum, sem samkvæmt dagskrá áttu að hefjast á mánudag og var því beint til skólastjóra að þeir leituðust við eftir föngum að skipuleggja skólastarfið með eðlilegum hætti frá og með mánudeginum. Stefán Jón Hafstein, formaður fræðsluráðs Reykjavíkur segir fáranlegt að skólastarf hefjist með vetrarfríi eftir svo langt verkfall. Slík skilaboð til barnanna gangi einfaldlega ekki. Finnbogi Sigurðsson, formaður félags grunnskólakennara segir kennara eiga rétt á þessum frídögum og verði gerð breyting þurfi að borga kennurum yfirvinnu fyrir þá vinnu sem þeir vinni.