Farið í fyrstu kílómetrana

Jónas Snæbjörnsson, svæðisstjóri hjá Vegagerðinni í Reykjavík, segir að verið sé að leggja lokahönd á samninga við landeigendur í Hrauni í Grindavík um lagningu Suðurstrandarvegar. "Það eru einhverjar vikur í að við auglýsum útboð vegna verksins," sagði hann en gerði engu að síður ráð fyrir að framkvæmdir við lagningu fyrsta hluta Suðurstrandarvegar Grindavíkurmegin gætu hafist strax eftir áramót. Svanur G. Bjarnason, svæðisstjóri Vegagerðarinnar á Suðurlandi, segist ekki geta sagt til um hvenær hafist verði handa við vegstúfinn inn í Þorlákshöfn, en taldi ljóst að það verði ekki á þessu ári. Suðurstrandarvegar hefur verið beðið með nokkurri eftirvæntingu síðustu ár, en horft er til þess að með lagningu hans verði Suðurland og Suðurnes orðin eitt atvinnusvæði. Áætlað var að lagningu vegarins yrði lokið árið 2006, en því var slegið á frest í byrjun síðasta árs. Því sér ekki enn fyrir verklok við lagningu vegarins, en fyrstu áfangarnir við bæina tvo eru ekki nema 6 til 8 kílómetrar samanlagt. Þá er eftir að leggja sjálfan veginn um 50 kílómetra leið meðfram sjónum.