Stuðst við skriflegan samning

Í samráði olíufélagnna þriggja var meðal annars stuðst við skriflegan samning um að þau skuli „ ekki stuðla að né koma á viðbótar sölustöðum né smásöludælum til einkaafnota á framangreindum stöðum nema að fengnu samþykki hinna félaganna, enda falli sú sala einnig inn í skiptin." Á grundvelli þessa samnings skiptu olíufélögin með sér markaðnum m.a. í tengslum við samrekstur bensínstöðva víða um land. Sáu félögin til þess að ekki kæmi til samkeppni á milli þeirra á tilteknum stöðum og spornuðu í sameiningu gegn því að viðskiptavinir út á landi nytu afslátta eða lækkaðs verðs þegar tekin var upp sjálfsafgreiðsla á bensínstöðvunum. Þá má nefna að félögin gerðu með sér samkomulag um að Skeljungur skyldi sitja einn að rekstri bensínstöðvar í Grindavík um fimm ára skeið. Auk þess að skipta með sér mörkuðum í tengslum við rekstur bensínstöðva víða um land skiptu olíufélögin með sér einstökum viðskiptavinum. Sem dæmi um þetta má nefna fyrirtæki eins og SR-mjöl, útgerðarfélagið Jökul á Raufarhöfn, ÍSAL, Kísiliðjunna, erlend skip og flugvélar. Einnig skiptu félögin með sér viðskiptum á t.d. Ísafirði og Stykkishólmi.