Óvíst að stjórnarskráin taki gildi

Stjórnarskrá Evrópusambandsins var undirrituð við hátíðlega athöfn í Róm í morgun. Óvíst er að hún taki nokkurn tíma gildi því aðildaríkin þurfa að samþykkja hana í þjóðaratkvæðagreiðslu. Leiðtogar Evrópusambandsríkja skiptust á að setjast við háborð og skrifa undir stjórnarskrána í morgun við mikið klapp og hátíðleika. Stjórnarskráin hefur verið kölluð hinn nýi Rómarsáttmáli enda fór undirritunin í morgun fram á sama stað og leiðtogar sex Evrópuríkja skrifuðu undir Rómarsáttmálann árið 1957 sem var upphafið að Evrópusamrunanum. Eiríkur Bergmann Einarsson, stjórnmálafræðingur við Háskóla Íslands segir að þrátt fyrir að undirritunin í morgun skipti miklu fyrir framþróun Evrópusambandsins sé framhaldið óljóst. Hann segir undirskriftina hins vegar í skugga þess að mögulegt sé að ákveðnar þjóðir hafni stjórnarskránni, svo sem Danir og Bretar. Það leiði af sér ákveðna óvissu með framhaldið. Stjórnarskráin að tryggja enn frekari samstarf og samvinnu Evrópusambandsríkjanna sem nú eru orðin 25 talsins. Eiríkur segir stjórnarskránna ekki breyta miklu í starfsemi ESB. Í raun sé fyrst og fremst verið að setja alla starfsemi Evrópusambandsins undir eitt plagg. Helsta breytingin sé sú að lýðræðislegri aðferðum hafi verið beitt við gerð stjórnarskrárinnar heldur en áður hefur þekkst. Því sé það hjákátlegt að þeir sem gagnrýni stjórnarskránna hve mest séu þeir sömu og gagnrýnt hafi ólýðræðisleg vinnubrögð Evrópusambandsins.