Rannveig forseti Norðurlandaráðs

Rannveig Guðmundsdóttir, þingmaður Samfylkingarinnar, verður forseti Norðurlandaráðs næsta árið. Guðni Ágústsson landbúnaðarráðherra mun hinsvegar stjórna Íslandi einn í næstu viku. Þing Norðurlandaráðs verður haldið í Stokkhólmi, dagana fyrsta til þriðja nóvember, og verður þá meðal annars kjörinn forseti ráðsins. Forsetaembættið kemur í hlut Íslands, að þessu sinni, og hefur Rannveig Guðmundsdóttir þingmaður samfylkingarinnar verið tilnefnd til embættisins, og Jónína Bjartmarz, þingmaður framsóknarflokksins verður varaforseti. Rannveig segir að Ísland muni vera með alveg sérstakar áherslur, á því ári sem hún og Jónína fara með forsetaembættin. Hún segir ekki fara hjá því að viðhorfið mótist af því að forsetinn komi frá Íslandi. Ákvörðun hafi verið tekin um það að Norðurlandaráð beini sjónum sínum að nágrannasvæðum Vestur-Norðurlanda, ekki síður en í austur. Þess má geta að vegna setu ráðherra á norðurlandaráðsþingi og vegna veikinda, verður Guðni Ágústsson, landbúnaðarráðherra eini starfandi ráðherrann á Íslandi næstu daga. Guðni hefur því öll ráð þjóðarinnar í hendi sér, og er ekki að efa að hann muni fara mjúklega með fólkið sitt.