Teppakaupin ekki einu einkaerindin

Teppakaup yfirmanns flugvallarins í Kabúl, sem enduðu með hryðjuverkaárás um síðustu helgi, eru ekki einu einkaerindin sem skotið hafa íslenskum friðargæsluliðum skelk í bringu. Friðargæsluliðarnir sem særðust eru væntanlegir heim til Íslands á morgun.  Engar reglur virðast hafa verið brotnar þegar friðargæsluliðarnir voru látnir bíða við teppabúðina á Kjúklingastræti eftir því að yfirmaður þeirra keypti teppi. Hins vegar tók það svo langan tíma að hryðjuverkamaður hafði tóm til að undirbúa og gera árás á þá með þeim afleiðingum að tveir almennir borgarar létu lífið og þrír friðargæsluliðar særðust; þeirra þriggja er von til Íslands á morgun. Samkvæmt upplýsingum fréttastofu reyndu þeir ítrekað að reka á eftir yfirmanni sínum og hlupu inn til hans eftir árásina með hjálm handa honum og skothelt vesti. Fréttastofu hefur ekki tekist að ná símasambandi við téðan mann í dag til að bera upplýsingarnar undir hann. Kurr ólgar vegna þess að friðagæsluliðarnir urðu að leggja sig í hættu af slíku tilefni og á dagbókarsíðu íslensks friðargæsluliða á Netinu kemur fram að friðargæsluliðar hafi áður verið uggandi vegna sendiferðar inn í Kabúl. Í það skiptið voru þeir á höttunum eftir örbylgjuofni til að geta poppað í kvikmyndahúsi í herbúðunum, villtust inn í þröngar götur og voru þeirri stund fegnastir þegar þeir loksins sluppu úr rangölunum og komust aftur heim - án þess þó að hafa fundið nokkurn örbylgjuofn. Á sömu síðu er karlmennska friðargæsluliðanna sem særðust mærð í besta hermannastíl og því lofað að þeir snúi aftur eins og höggnir úr stein. Utanríkisráðuneytið hefur aflað sér skýrslna um árásina á laugardaginn var en þær eru, að mati ráðuneytisins, trúnaðargögn.