Varnaðarorð á ársþingi ASÍ

Verkalýðsforystan hefur af því verulegar áhyggjur að forsendur kjarasamninga séu að bresta, en í samningum sem gerðir voru í vor eru ákvæði um verðlagsforsendur og viðbrögð standist þær ekki. Grétar Þorsteinsson, forseti Alþýðusambandsins (ASÍ), sagði í opnunarræðu ársþings ASÍ, sem hófst í gær, að teikn væru á lofti sem hann hefði verulegar áhyggjur af. "Sérstakan ugg vekur að fjárlagafrumvarp ríkisstjórnarinnar virðist einnig gera ráð fyrir að verðbólga verði meiri en forsendur kjarasamninga ganga út frá. Það veldur mér þó enn meiri áhyggjum að ríkisstjórnin virðist ekki átta sig á þessu, eða virðist ekki hafa af þessu neinar sérstakar áhyggjur. Þess sér að minnsta kosti ekki nein merki í stefnumörkun ríkisstjórnarinnar í efnahagsmálum," sagði hann. Grétar sagði einnig að fátt væri til að auka fólki bjartsýni um að hrinda ætti í framkvæmd úrbótum í velferðarkerfinu. "Eins og við höfum kallað eftir og eins og allir stjórnmálaflokkar höfðu góð orð um fyrir síðustu kosningar og samstarfssáttmáli ríkisstjórnarinnar gaf nokkur fyrirheit um. Þetta eru veruleg vonbrigði," sagði hann og benti á að nú virtist ríkissjóður hafa fjárhagslegt svigrúm til að taka myndarlega á í þeim efnum. "Þess í stað hefur ríkisstjórnin ákveðið að lækka skatta um 23 milljarða á kjörtímabilinu. Á það hefur verið bent, bæði af Seðlabankanum, Alþýðusambandinu og Hagfræðistofnun Háskólans, að það sé líklegt að við þessar aðstæður virki skattalækkanir þensluhvetjandi. Ég held að menn verði að hugsa þessa hugsun til enda. Það liggur ljóst fyrir, að til að sporna gegn þeim áhrifum verða menn að draga úr útgjöldum á móti." Grétar ítrekaði að Alþýðusambandið hafnaði því alfarið að niðurskurður ríkisins af þessum sökum kæmi niður á velferðarkerfinu. "Ég ætlast til þess að forsvarsmenn ríkisstjórnarinnar eyði þeirri óvissu sem sannarlega er uppi í þessu efni og kveði upp úr um það að ekki verði gripið til þess ráðs að skera niður í velferðarkerfinu til að fjármagna áformaðar skattalækkanir," sagði hann.