Áherslan á bjargráð heimamanna

Rauði krossinn kynnti í gær árbók um hamfarir og hjálparstarf. Bókin nefnist World Disasters Report og er nú gefin út í tólfta sinn. Með útgáfu bókarinnar reynir Rauði krossinn að gefa árlegt tölulegt yfirlit yfir viðfangsefni hjálparstofnana auk gagnrýninnar umfjöllunar um alþjóðlegt hjálparstarf. Jeremy Hughes upplýsingastjóri Alþjóðasambands Rauða kross félaga kynnti bókina á fundi formanna og framkvæmdastjóra norrænna Rauða kross félaga sem fram fór í Reykjavík. Í bókinni er bent á mikilvægi þess að bjargráð þolenda hamfara séu tekin með í reikninginn þegar hjálparstarf er skipulagt. Þá kemur fram í henni að í fyrra hafi 255 milljónir manna orðið fyrir skakkaföllum vegna hamfara og 76.806 manns látið lífið af þeim sökum, eða þrisvar sinnum fleiri en árið 2002. Í árbókinni er bent á að yfirleitt séu það sjálfir íbúarnir á hamfarasvæðunum sem fyrstir eru til að bregðast við vá og sagt að nánari skoðun hafi leitt í ljós að mikilvægt sé að gera ráð fyrir bjargráðum fólks á staðnum þar sem stórslys eða hamfarir hafa átt sér stað. Með því móti er sagt að hægt sé að gera hjálparstarf skilvirkara og forðast að draga úr frumkvæði og getu heimamanna.