Og Fjarskipti keyptu 90% hlutafjár

Eignarhaldsfélagið Og Fjarskipti hefur keypt 90 prósent hlutafjár í Norðurljósum sem reka sex útvarpsstöðvar, fjórar sjónvarpsstöðvar, gefa út tvö dagblöð, tímarit og reka netmiðil. Norðurljós verða þar með komin inn á verðbréfamarkaðinn. Stærstu hluthafar í Norðurljósum voru Baugur, Kári Stefánsson, Pálmi Haraldsson og tengd fyrirtæki, Burðarás og Hömlur. Þeir frá greitt fyrir hluti sína með hlutabréfum í Og Fjarskiptum og verða þannig áfram óbeinir eigendur að Norðurljósum. Og Fjarskipti eru skráð á verðbréfamarkaði og verða Norðurljós það því sjálfkrafa. Stjórnendur telja að þetta hafi verið besta leiðin til að koma Norðurljósum á almennan markað á sem skemmstum tíma og að æskilegt sé að fjölmiðlafyrirtæki af þessari stærð sé á almennum hlutabréfamarkaði. Jafnframt hefur sú breyting orðið á yfirstjórn Norðurljósa að Sigurður G. Guðjónsson lætur af störfum framkvæmdastjóra Norðurljósa og útvarpsstjóra Íslenska útvarpsfélagsins. Þá hafa Marinó Guðmundsson fjármálastjóri og Karl Garðarsson í yfirstjórn óskað eftir að láta af störfum. Stjórn Norðurljósa ákvað á fundi sínum í gærkvöldi að ráða Gunnar Smára Egilsson framkvæmdastjóra Norðurljósa í stað Sigurðar og Páll Magnússon verður sjónvarpsstjóri Stöðvar 2. Þá tekur Kári Jónasson, fyrrverandi fréttastjóri Ríkisútvarpsins, við ritstjórn Fréttablaðsins á morgun. Nánari útfærsla á skipulagi verður unnin á næstu þremur mánuðum og er stefnt að því í þeirri vinnu að tryggja sjálfstæði einstakra fjölmiðla í eigu fyrirtækisins. Breytingarnar munu ekki leiða til fækkunar starfsmanna Norðurljósa.