Yfirmaður sakaður um aðgæsluleysi

Friðargæsluliðarnir íslensku sem urðu fyrir sjálfsmorðsárás í Kabúl síðastliðinn laugardag höfðu beðið yfirmanns síns fyrir utan teppaverslun á Chicken street í klukkustund þegar árásin var gerð. Heimildir Fréttablaðsins herma að friðargæsluliðarnir hafi verið uggandi og hafi hafi fjórum sinnum reynt að reka á eftir yfirmanni sínum enda hefði þeim verið ljóst að þessi gata væri talin afar hættuleg. Hluti íslensku friðargæsluliðanna stóðu fyrir utan verslunina vopnaðir, íklæddir einkennisklæðum og óku ökutæki merktu friðargæsluliðs NATO. Vestræn sendiráð og hjálparstofnanir hafa varað starfsmenn sína við að fara um svokallað Chicken street, eins og fram kom í Fréttablaðinu í gær. Tveir létust í sprengjutilræðinu á laugardag, 23 ára amerísk kona og 11 ára gömul afgönsk stúlka auk tilræðismannsins. Fréttablaðið kynnti Hallgrími Sigurðssyni, ofursta yfirmann íslenska friðargæsluliðsins í Kabúl efnisatriði þessarar fréttar í gærkvöldi en símasamband við hann slitnaði. Atburðarásin í kringum árásina verður könnuð, að sögn Gunnars Snorra Gunnarssonar, ráðuneytisstjóra í utanríkisráðuneytinu. Hann segist ekki hafa neinar upplýsingar um hversu lengi verslunarferð Hallgríms hafi staðið yfir eða hvort undirmenn hans hafi verið uggandi um stöðu sína. "Til mín hafa ekki borist skriflegar skýrslur um atburðinn og heldur ekki kvartanir frá mönnum í friðargæsluliðinu. Við förum yfir þetta með eigin yfirmönnum og í ráðgjöf við aðra sem vinna á staðnum." Arnór Sigurjónsson, skrifstofustjóri Íslensku friðargæslunnar, segir að yfirlýsing sem hann lét falla um að íslensku friðargæsluliðarnir færu ekki út af flugvellinum nema að brýna nauðsyn bæri til hafi verið gefin í upphafi verksins. Síðan þá hafi hlutirnir breyst.