Fanga neitað um geðhjálp

Stjórn Geðhjálpar segir að dæmdum einstaklingi í fangelsi, sem gert hefur ítrekaðar sjálfsvígstilraunir, sé neitað um nauðsynlega geðheilbrigðisþjónustu. Þess í stað hafi hann verið vistaður í einangrunarklefa í fangelsinu. Stjórnin lýsir þungum áhyggjum vegna úrræðaleysis í málefnum geðsjúkra fanga. Í ályktun frá stjórn félagsins segir að þess séu dæmi að geðdeildir neiti þessum sjúklingum um vistun og meðferð sem sé í senn mannréttindabrot og lögbrot. Þá hafi vistmaður á Sogni verið fluttur í gæsluvarðhaldseinagrun á Litla-Hrauni þar sem Sogn telji sig ekki hafa þá aðstöðu sem til þarf. Stjórn Geðhjálpar skorar á stjórnvöld að bæta til muna þessa þjónustu og fagnar að í undirbúningi sé sérstök geðdeild sem sinna eigi erfiðustu sjúklingunum, en bendir á að bregðast þurfi strax við þeim málum sem uppi eru.