Fimmfaldast tekjur af álverinu?

Tekjur Hafnarfjarðarbæjar af álverinu í Straumsvík myndu ríflega fimmfaldast ef fasteignaskattur yrði tekinn upp og álverið verður stækkað eins og fyrirhugað er að gera. Þetta kemur fram í svari við fyrirspurn bæjarráðsmanna Sjálfstæðisflokksins um tekjur af álverinu í Straumsvík og Víkurfréttir greina frá í dag. Ef skattgreiðslur ALCAN myndu breytast frá því að vera skattur af framleiðslu yfir í að vera venjulegir fasteignaskattar myndu tekjur Hafnarfjarðarbæjar af álverinu í Straumsvík tvöfaldast. Tekjur Hafnarfjarðarbæjar af álverinu eru nú 93 milljónir króna á ári en færu í 174 milljónir ef fyrirkomulaginu yrði breytt. Bæði Hafnarfjarðarbær og ALCAN vilja breyta þessu fyrirkomulagi en það strandar á samþykki ríkisins. Fyrirhugað er að stækka álverið um helming þannig að meðalframleiðsla þess verði 173 þúsund tonn á ári. Ef áfram verður framleiðslugjald myndu tekjur bæjarins af álverinu vera 186 milljónir króna en ef um fasteignaskatt væri að ræða yrðu tekjurnar 464 milljónir króna.